بۆ تاوتوێكردنى ڕه‌وشى ته‌ندروستى ئاواره‌كان به‌ڕێوه‌به‌رى گشتى ته‌ندروستى هه‌ولێرله‌گه‌ڵ شاندێكى باڵاى وه‌زاره‌تى ته‌ندروستى عێڕاقى فیدراڵ كۆبۆوه‌
ئه‌مڕۆ كاتژمێر(10:30) خوله‌كى به‌یانى ڕێكه‌وتى 24/11/2014 به‌مه‌به‌ستى چۆنیه‌تى پێشكه‌شكردنى خزمه‌تگوزارى ته‌ندروستى به‌ ئاواره‌كانى ناوه‌خۆى عێڕاق (د.سامان حسێن به‌رزنجى) به‌ڕێوه‌به‌رى گشتى ته‌ندروستى هه‌ولێر له‌گه‌ڵ شاندێكى باڵاى وه‌زاره‌تى ته‌ندروستى عێڕاقى فیدراڵ كۆبۆوه‌، له‌ كۆبونه‌وه‌كه‌دا كه‌ به‌ڕێوه‌به‌رى كاروبارى پاراستنى ته‌ندروستى و به‌ڕێوه‌به‌رى به‌شى پشكنین و به‌دواداچوون ئاماده‌ى بوون له‌لایه‌ن شاندى میوان كه‌ پێك هاتبوون له‌ به‌شه‌ جیاوازه‌كانى دیوانى وه‌زاره‌تى ته‌ندروستى فیدراڵ باسیان له‌ ئه‌جنداى سه‌ردانه‌كه‌یان كرد بۆ هه‌ولێر پایته‌خت به‌مه‌به‌ستى به‌دواداچوون و ڕێپێوكردنى كه‌مپه‌كانى ئاواره‌كانى ناوه‌خۆى عێڕاق بۆ ئه‌وه‌ى بتوانن خزمه‌تگوزارى ته‌ندروستى له‌ ڕێگه‌ى به‌ڕێوه‌به‌رایه‌تى گشتى ته‌ندروستى هه‌ولێره‌وه‌ پێشكه‌ش به‌و ئاوارانه‌ بكرێت، به‌ڕێوه‌به‌رى گشتى ته‌ندروستى هه‌ولێر پانۆڕامایه‌كى گشتى له‌سه‌ر چۆنیه‌تى پێشكه‌شكردنى خزمه‌تگوزارى ته‌ندروستى به‌ئاواره‌كان له‌لایه‌ن به‌ڕێوه‌به‌رایه‌تى گشتى ته‌ندروستى هه‌ولێره‌وه‌ بۆ شاندى میوان خسته‌ڕوو له‌لایه‌ن شانده‌كه‌شه‌وه‌ ئه‌وه‌ ڕاگه‌یاندرا كه‌ ئه‌وان ئاگادارى ئه‌و خزمه‌تگوزاریه‌ ته‌ندروستیانه‌ن كه‌ له‌لایه‌ن ته‌ندروستى هه‌ولێره‌وه‌ پێشكه‌ش به‌ ئاواره‌كان كراوه‌ به‌ناوى وه‌زاره‌تى ته‌ندروستى فیدراله‌وه‌ سوپاسى به‌ڕێوه‌به‌رایه‌تى گشتى ته‌ندروستى هه‌ولێر كرا كه‌ به‌خێرایى و به‌شێوه‌یه‌كى زۆر باش توانیان خزمه‌تگوزارى به‌په‌له‌ پێشكه‌ش به‌ ئاواره‌كان بكه‌ن، به‌ڕێوه‌به‌رى گشتى ئه‌وه‌ى به‌شانده‌ میوان ڕاگه‌یاند كه‌ ده‌بێت له‌مه‌ودوا هه‌ماهه‌نگى ته‌واو هه‌بێت له‌ نێوان هه‌ردوولا بۆ ئه‌وه‌ى بتوانن به‌شێوه‌یه‌كى باشتر خزمه‌تگوزارى ته‌ندروستى پێشكه‌ش به‌ئاواره‌كان بكرێت ئاماده‌یى به‌ڕێوه‌به‌رایه‌تى گشتیشى ده‌ربڕى بۆ هه‌ر هه‌ماهه‌نگى و ئاسانكاریه‌ك كه‌ ببێته‌ مایه‌ى پێشكه‌شكردنى خزمه‌تى زیاتر له‌ ڕووى ته‌ندروستیه‌وه‌، شاندى وه‌زاره‌تى ته‌ندروستى فیدراڵ سه‌ره‌تا به‌ ڕوپێوكردنى كێشه‌ ته‌ندروستیه‌كانى یه‌كێك له‌ كه‌مپه‌كانى ئاواره‌كان ده‌ست پێده‌كه‌ن بۆ ئه‌وه‌ى بتوانن به‌ هه‌ماهه‌نگى ته‌ندروستى هه‌ولێر پێداویستى ته‌ندروستى زیاتر پێشكه‌ش به‌ ئاواره‌كان بكه‌ن هاتنى ئه‌م شانده‌ش دواى ئه‌وه‌ دێت كه‌ هه‌فته‌ى ڕابردوو بریكارى وه‌زیرى ته‌ندروستى عێڕاقى فیدراڵ له‌سه‌ردانێكیدا بۆ وه‌زاره‌تى ته‌ندروستى حكومه‌تى هه‌رێمى كوردستان دانى به‌وه‌ دانا كه‌ وه‌زاره‌تى ته‌ندروستى عێڕاقى فیدراڵ كه‌مته‌رخه‌م بووه‌ له‌ گه‌یاندنى خزمه‌تگوزارى ته‌ندروستى به‌ئاواره‌كانى ناوه‌خۆى عێڕاق